Mungon vetëm zyrtarizimi, por deri më tani mund të thuhet se Brazili do të fluturojë në Kampionatin Botëror të ardhshëm. Edhe me shtatë sfida për të luajtur, Seleçao është 15 pikë larg pozicionit të pestë që mbahet nga Uruguai, një hendek pothuajse i pakalueshëm.
Pikërisht ndaj uruguaianëve, Brazili regjistroi fitoren e 10-të në 11 sfida, ku në “Arena da Amazônia” ia doli të triumfojë me shifrat e thella 4-1. Rapinja ishte hero me dy gola, teksa pokerin e plotësuan Nejmar dhe Gabriel Barbosa. Goli i vetëm i Uruguajit mban firmën e Suarez, i cili rrezikon të mos jetë në turneun e Katarit.
Argjentina blindon vendin e dytë me 6 pikë më pak se Brazili. Albiselestët fituan minimalisht 1-0 ndaj Perusë dhe tashmë distanca me ndjekësit më të afërt, Ekuadorin shkon në 8 pikë. Goli me aromë fitoreje e shënoi Lautaro Martinez, teksa Peruanët ishin të pafat, pasi iu anuluan dy gola dhe humbën vetë një penallti me anë të Jotun.
Kili është rikthyer në lojë për një biletë vajtjeje në Katar. Të udhëhequr nga Sançez e Vidal, kilianët mposhtën pastër 3-0 Venezuelën. Kolumbia regjistron barazimin e tretë radhazi dhe mbetet ende në zonën kualifikim për të paktën deri në ndeshjen e radhës. Kolumbianët nuk arritën të gjenin sërish rrjetën kundër Ekuadorit. Surprizë fitorja e Bolivisë, 4-0 ndaj Paraguait.
