Ish-presidenti i Brazilit, Jair Bolsonaro, është shpallur këtë të enjte fajtor për planifikimin e një grushti shteti ushtarak.
Tre nga pesë gjyqtarë të Gjykatës së Lartë, e gjetën 70-vjeçarin fajtor për drejtimin e një komploti që synonte ta mbante atë në pushtet pasi humbi zgjedhjet e vitit 2022 ndaj rivalit të tij të majtë, Luiz Inácio Lula da Silva.
Megjithëse plani nuk arriti të siguronte mbështetje të mjaftueshme nga ushtria për t’u realizuar, ai përfundoi me sulmin ndaj ndërtesave qeveritare nga mbështetësit e Bolsonaros më 8 janar 2023, sipas gjyqtarëve.
Sipas BBC një gjyqtar e shpalli të pafajshëm Bolsonaron dhe një tjetër ende nuk ka votuar, por shumica e thjeshtë mjafton për ta dënuar ish-presidentin, i cili tani mund të përballet me dekada burg. Dënimi për të do të jepet të premten.
Fati i ish-presidentit u vulos të enjten, kur gjyqtarja Carmén Lúcia dha votën e saj.
Ajo e shpalli atë fajtor për të gjitha pesë akuzat: përpjekje për të organizuar një grusht shteti, drejtim të një organizate kriminale të armatosur, përpjekje për shfuqizim të dhunshëm të rendit demokratik, si dhe dy akuza të tjera të lidhura me dëmtimin e pronës gjatë sulmit ndaj ndërtesave në Brasília më 8 janar 2023.
