Kriza energjitike/ Balluku: Do të kemi më shumë se një dimër të vështirë

Ministrja Belinda Balluku paralajmëroi sot në emisionin Opinion se do të kemi më shumë se një dimër të vështirë, pasi kemi një krizë globale energjitike.

Balluku tha se nuk bëhet fjalë për çmimin, por sepse ka një mungesë të energjisë në treg.

“Ka një kërkesë më të madhe të kërkesës në treg se sa energji ofrohet”, tha Balluku, duke shtuar se sipas ekspertëve kriza mund të zgjasë edhe përtej verës së 2022.

Balluku tha se gjatë muajit gusht u vendosën në linjë disa faktorë që tregonin se mund të kishim një krizë energjitike.

Ajo tha se nuk ka shanse që Shqipëria të kthehet në kohën me energji të reduktuar. “Synojmë të ofrojmë 24 orë energji elektrike dhe po marrim masat për të siguruar furnizimin e nevojshëm”, tha Balluku.

LEXO EDHE  I gjendet dr*gë në makinë, arrestohet

Ministrja tha se Qeveria do të kalojë një VKM, e cila do të përcaktojë të gjitha hapat, lidhur me mënyrën se si do të menaxhohet i gjithë rrjeti energjitik. Balluku tha se janë dy paketa, në total 200 mln euro, për të siguruar sasinë e nevojshme të energjisë në treg.

“Abonetët familjarë dhe ato të biznesit të vogël do të vazhdojnë të paguajnë çmimin e energjisë sikundër paguhet deri më sot. Energjia që do të prodhohet nga kaskadat do të furnizojë abonetët familjarë dhe ato të biznesit të vogël”, tha Balluku.

Lidhur me biznesin e madh, Balluku tha se nga 96 biznese të mëdha vetëm 10 furnizohen nga OSHEE, ndërsa të tjerat do të furnizohen nga tregu, pra ky është liberalizimi i tregut.