Gjykata e Apelit Tiranë, ka zhvilluar ditën e sotme seancën lidhur me caktimin e masës së sigurimit për Elisabeta Bardhollarin dhe Orjada Hoxhën, inferimieren dhe shitësen e një dyqani elektroshtëpiakesh. Në bashkëpunimin me njëra-tjetrën, ato akuzohet se merrnin kredi në emër të pacientëve, të cilëve infermierja Bardhollari u vidhte kartat e identitetit në spitalin ku punonte.
Për Bardhollarin u caktua masa e arrestit me burg, ndërsa për të akuzuarën tjetër u vendos masa e arrestit shtëpiak. Kështu, apeli la në fuqi masat e dhëna nga shkalla e parë.
39-vjeçarja Bardhollari ishte e punësuar si infermiere në spitalin nr.5 në Tiranë, ndërsa 32 vjeçarja Hoxha, punonte si shitëse në një subjekt privat që tregtonte pajisje elektroshtëpiake. Sipas policisë, nga hetimet ka rezultuar se infermierja e spitalit, vidhte kartat e identitetit të pacientëve që shkonin për mjekim dhe më pas ia jepte shtetases Orjada Hoxha, e cila punonte si shitëse në një subjekt privat që tregtonte pajisje elektroshtëpiake. Hoxha i përdorte kartat e identitetit për të marrë kredi, me qëllim për të blerë pajisje të ndryshme në dyqanin ku punonte, të cilat transportoheshin nga shtetasi A.H. dhe më pas i shisnin në bashkëpunim me njëri-tjetrin.
