Partia Demokratike, përmes Sekretarit të Grupit Parlamentar, Arbi Agalliu, shprehet se kriza me energjinë erdhi si pasojë e tenderave korruptivë në OSHEE”
Duke iu përgjigjur deklaratave të qeverisë, sipas të cilës, kriza ka ardhur si rezultat i tregjeve ndërkombëtare, Agalliu tha se kjo është një krizë korrupsioni.
“Kjo krizë i ka themelet në abuzimin e tenderave me miliona euro që zhvillon OSSHE. Kjo krizë buron nga punësimi në administratën publike dhe në OSSHE të qindra patronazhistëve që paguhen nga taksat e shqiptarëve. Kjo krizë e ka themelin në abuzimin dhe vjedhjen që bëhet në këtë sektor.
Ne nuk kemi asnjë investim real në sektorin e energjisë në Shqipëri.
Dëgjuam qeverinë sot se si tha që nuk do të rritet çmimi i energjisë elektrike për konsumatorin dhe për biznesin e vogël, por në asnjë moment nuk dëgjuam se çfarë do te ndodhë me çmimin e energjisë elektrike për biznesin e madh.
Është e pashmangshme nëse do të kemi rritje të çmimit të energjisë elektrike për këte sektor të mos preket qytetari shqiptar.
Njerëzit , qytetarët, konsumatorët,, blejnë produkte dhe shërbime që ofrohen nga biznesi i madh dhe në këtë kontekst xhepi i çdo shqiptari do të rëndohet në mënyrë të pashmangshme”, tha Agalliu.
