Një 30-vjeçar është arrestuar nga policia e Durrësit për veprat penale “Prodhimi dhe mbajtja pa leje e armëve luftarake dhe e municionit” dhe “Prodhimi dhe shitja e narkotikëve”.
Burime zyrtare nga policia lokale konfirmuan këtë të Martë se në banesën e të riut është gjetur drogë dhe një armë pa leje.
“Shërbimet e Komisariatit të Policisë Durrës, në bashkëpunim me Seksionin për Hetimin e Narkotikëve në DVP Durrës, pas një informacioni të marrë në rrugë operative se 1 shtetas me pseudonimin ‘Rebeli’ lëvizte me armë në zonën e lagjes nr. 13, Durrës dhe shpërndante lëndë narkotike në doza, kanë organizuar dhe kanë finalizuar operacionin policor të koduar ‘Rebeli’. Në kuadër të operacionit u bë kapja dhe arrestimi në flagrancë i shtetasit E. M., 30 vjeç, banues në lagjen nr. 13 Durrës, i dënuar më parë për prodhim dhe shitje të narkotikëve”, njoftoi policia.
Gjatë kontrollit fizik dhe më pas në banesë, shërbimet e Policisë gjetën dhe sekuestruan në cilësinë e provës materiale: një armë zjarri tip pistoletë, 1.2 kilogramë lëndë narkotike e dyshuar kanabis sativa, një pjesë e së cilës ishte e ndarë në doza gati për shitje, një sasi farash si ato të kanabis sativa, një peshore elektronike dhe dy aparate celularë.
DENONCO