Numri i nxënësve dhe studentëve të regjistruar në shkolla dhe universitete, çdo vit po shënon një rënie të ndjeshme.
INSTA raporton se në dy vitet e fundit, janë mbi 51 mijë regjistrime më pak.
Ulja e regjistrimeve në arsimin parauniversitar dhe atë universitar lidhet me rritjen e emigrimeve familjare, por edhe me largimin e studentëve jashtë vendit.
Ish drejtori i arsimit Qemal Çejku jep edhe një arsye tjetër, e cila lidhet me tarifat e larta për studime.
“Faktor tjetër është emigrimi i familjeve të nxënësve të shkollave të mesme, por edhe emigrimi i studentëve. Mos ulja e kuotave dhe mos ulja e pagesave vjetore ne universitete.”
Tjetër shqetësim është edhe braktisja e shkollave nga familjet me nevoja ekonomike.
“Janë barra të tjera sociale, ka shume nxënës që e braktisin shkollën për shkak të pamundësisë ekonomike.”
Ky vit shkollor po haset edhe me një shqetësim tjetër. Atë të mungesës së mësuesve.
Portali mësues për Shqipërinë rendit 23 shkolla vetëm në kryeqytet që kanë mungesë mësuesish.
