Partizani ka nisur përgatitjet për ndeshjet e radhës në Kupë dhe kampionat. Të kuqtë nuk kanë shijuar ende fitoren e parë për këtë sezon të Superligës dhe ndeshja e radhës në kampionat do të jetë ndaj Kukësit.
Para kësaj ndeshje, Partizani do të luajë ndeshjen e kthimit në Kupë kundër Tërbunit, por trajneri Daja pritet të aktivizojë lojtarët e stolit duke parë që ndeshjen e parë e kanë fituar 0-3 në transfertë.
Në seancën e djeshme stërvitore të Partizanit, Ergys Kaçe është stërvitur i diferencuar. Mesfushori ka një problem në kofshë, por nuk rrezikon ndeshjen e kampionatit. Një tjetër lojtar që shqetëson trajnerin Daja është Dajan Shehi. Mbrojtësi ka një tërheqje muskulare dhe pritet të mungojë për rreth 2 javë e me shumë mundësi humbet supersfidën ndaj Kukësit.
