Autoritetet britanike dënuan një 20-vjeçar shqiptar, pasi u kap në një banesë, e cila ishte kthyer në një serë për kultivimin e kanabisit.
Shtëpia e kanabisit në qytetin Coventry, u zbulua nga një inxhinier, i cili kishte shkuar për të rregulluar problemet me energjinë elektrike.
Në momentin kur inxhinieri kuptoi se shtëpia përdorej për kultivim kanabis ka njoftuar policinë, e cila arrestoi 20-vjeçarin shqiptar, Eduart Shuli që ishte fshehur në tualetin e shtëpisë.
Në dy dhoma gjumi dhe papafingo kishte gjithsej 124 bimë kanabis të cilat, kur të piqeshin, do të kishin prodhuar kanabis me vlerë 1,000 £ nga secila bimë – një total prej më shumë se 100,000 paund.
Para gjykatës Shuli shpjegoi se atij i ishte drejtuar një mik në Shqipëri, i cili e kishte ftuar në Coventry për të punuar si kopshtar për rritjen e kanabisit.
Gjykata vendosi që i riu shqiptar të dënohej me 26 muaj burg, pasi u deklarua fajtor për prodhim të lëndëve narkotike.
