Kampionët e Europës, Italia u dorëzua përballë Spanjës në gjysmëfinalen e Nations League, çka do të thotë se kampionët e Mancinit nuk do të kenë mundësinë të ngrenë një tjetër trofe, madje në shtëpinë e tyre.
Ishte Spanja që triumfoi në këtë përballje plot me emocione dhe episode me rezultatin 2-1, sukses që e çon skuadrën e Luis Enriques në finalen e madhe të Nations League.
Ndeshja ishte me shumë raste dhe Italia u paraqit e rrezikshme me Chiesën në minutat e para porn ë 18’ ishte Ferran Torres që i jep avantazhin “La Rojas”.
Për t’u theksuar që Donnarumma u mbyt me vërshëllima nga tifozët në “San Siro” për tradhtinë ndaj Milanit dhe kjo ndikoi kur për pak një top i iku nga duart portierit dhe preku shtyllën.
Gjithsesi Italia kishte mundësinë më të mirë për të shënuar me Insigne pothuajse vetëm për vetëm por dështoi dhe Spanja nuk falin në rastin e radhës kur Ferran Torres me kokë çoi topin në rrjetë në 45+1’.
Bonucci duhet thënë që zhgënjeu shumë pasi mori dy kartonë të verdhë dhe la Italinë me 10 lojtarë.
Pjesa e dytë ishte më shumë një menaxhim i lojës nga Spanja ndërsa në 83’, Italia përfiton nga një gabim i Spanjës për të shkurtuar diferencën në 2-1 me Pellegrinin por asgjë nuk ndodh më dhe “La Roja” pret biletën për në finalen e “Nations League”.
