Ministrja e Arsimit, Evis Kushi ka lajmëruar se universitetet nuk do të hapin dyert më 11 Tetor, siç ishte njoftuar më parë. Ministrja ka bërë me dije se data e re është 18 Tetori.
Po ashtu, ajo lajmëroi se “javën e ardhshme e kemi shpallur si ‘Java e vaksinimit masiv të studentëve'”.
“E që kjo javë të jetë sa më produktive, me kërkesë të Konferencës së Rektorëve, viti i ri akademik do të fillojë zyrtarisht në datën 18 tetor, me qëllim që nga data 11-17 tetor të gjithë së bashku të jemi të fokusuar vetëm në procesin e vaksinimit të studentëve”, shkruan ministrja në një postim në rrjetet sociale.
“Nga universitetet do të kërkoja sa më shumë bashkëpunim dhe koordinim me strukturat e shëndetësisë, për të venë në dispozicion të gjitha hapësirat e nevojshme për studentët dhe personelin e vaksinimit, ndërsa studentëve do t’u lutesha me gjithë zemër e do t’i inkurajoja fort që ta shfrytëzojnë edhe këtë mundësi të re, me qëllim që viti i ri akademik të jetë sa më i mbarë e i suksesshëm”, shton ajo.
Sipas një urdhri të ministres së Shëndetësisë Ogerta Manastirliu, studentët duhet të paraqesin certifikatën e vaksinimit COVID-19 apo kartën e vaksinimit, për të hyrë në institucionet e arsimit të lartë.
