Ardian Çollaku, 50-vjeçari i cili u qëllua me armë zjarri ditën e djeshme në Elbasan, ka ndërruar jetë mëngjesin e sotëm (5 tetor) në Spitalin e Traumës, në Tiranë.
Ai mbeti i plagosur fillimisht nga atentati i djeshëm dhe u dërgua me plagë të rënda drejt Spitalit të Traumës në Tiranë. Çollaku kaloi në vdekje klinike dhe nuk arriti të mbijetpjë.
Ngjarja e rëndë ka ndodhur ditën e djeshme në Bradashesh, në afërsi të rrethrrotullimit të luleve ku përveç Ardian Çollakut, u vra dhe Lulzim Bitri. Sipas njoftimit të policisë, dyshohet se nga një automjet në lëvizje eshte qëlluar me armë zjarri në drejtim të dy personave këmbësore.
Lulzim Bitri 35-vjeç mbeti i vrarë në vendngjarje, ndërsa Ardian Çollaku mbeti i plagosur.
Autorët janë ende në arrati.
Dy viktimat dyshohet se janë pjesë e grupeve kriminale që operojnë në këtë qytet. Raportohet se Ardian Çollaku (Subashi) është hetuar për vrasjen e Everest Çakajt, ngjarja që ndodhi më 11 maj të këtij viti, në të cilën dyshohet se ka pasur lidhje direkte. Nga ana tjetër, Lulzim Bitri raportohet si lidhje e fortë e Talo Çelës, një nga miqtë më të afërt të tij.
50-vjeçari Ardian Çollaku nuk rezulton një emër i panjohur për Policinë.
Subashi është arrestuar në 26 maj të vitit 2015 në qendër të qytetit të Elbasanit, për llogari të shtetit italian, pasi një ditë më parë ai ishte shpallur në kërkim ndërkombëtar nga Interpol Tirana. Policia njoftoi asokohe se, Ardian Subashi ishte dënuar nga Gjykata e Modenas, me 23 vjet e 3 muaj e 17 ditë burgim për veprat penale të “Shfrytëzimit të prostitucionit” dhe “Prodhimit dhe mbajtjes pa leje e armëve luftarake dhe e municionit” parashikuar nga nenet 110 dhe 600 të Kodit Penal Italian. Nga një kërkim në faqen zyrtare të Gjykatës së Elbasanit, nuk rezulton asnjë e dhënë mbi rastin në fjalë. Nuk ka asnjë informacion lidhur me ecurinë e çështjes së arrestimit të Ardian Subashit për llogari të autoriteteve italiane dhe mosekstradimin e tij drejt Italisë.
Po ashtu, Subashi ka qenë edhe subjekt i OFL ku vitin e kaluar së bashku me 3 persona të tjerë u është kërkuar deklarimi i pasurisë.
Në vitin 2017, Çollaku shkaktoi një aksident me pasojë vdekjen e një personi. Dyshohet se Çollaku humbi kontrollin e automjetit tip “Range Rover” duke përplasur dy makina tip “Golf” dhe një person që po udhëtonte me biçikletë. Ky i fundit humbi jetën. I ndjeri ishte Ardian Rika, 35 vjeç, punonte si marangoz.
