Të kesh një drejtues si Beppe Marotta, është plusi më i madh për një skuadër në Serinë A. Një programues për të ardhmen dhe drejtues shumë i aftë, Marotta ka perfeksionuar goditjen e radhës për Interin me parametër zero, dhe bëhet fjalë për një portier që klubet e tjera do të kishin paguar shumë për ta patur.
Është Andre Onana, operacioni i radhës i Marottës dhe Ausilios të cilët kanë mbyllur akordin me portierin e Ajaxit, ku kontrata i skadon verën e ardhshme.
Gardiani 25-vjeçar nga Kameruni po rikthehet nga një skualifikim 1-vjeçar për doping, për një gabim të bashkëshortes së tij ndërsa vlerat si portier nuk diskutohen, madje te Ajaxi bënë të pamundurën për ta mbajtur sërish në skuadër duke i ofruar rinovimin të cilin e refuzoi.
Onana pati një ofertë edhe nga Lille në verë që ofroi para për kartonin e tij edhe pse ishte i skualifikuar, ofertë që e refuzoi gjithsesi, pasi në mendje kishte Interin. Marotta kishte vendosur kontakte herët me lojtarin dhe sot mund të konfirmohet se ai do të mbrojë portën zikaltër duke nisur nga sezoni i ardhshëm.
