Një ngjarje e rëndë ka tronditur mbrëmjen e sotme qytetin e Elbasanit duke rikthyer frikën dhe pasigurinë për jetën tek qytetarët.
Pranë një pikë karburanti, në hyrje të Elbasanit, janë qëlluar me armë zjarri Ardian Subashi (Çollaku) dhe Lulzim Bitri, dy emra të njohur të botës së krimit. Bitri mbeti i vdekur në vend, ndërsa Subashi u transportua në spital. Në një njoftim zyrtar, policia informoi fillimisht se Subashi humbi jetën në spital. Por, më pas konfirmoi se ka pësuar vdekje klinike dhe është nisur me helikopter drejt Tiranës.
Subashi është arrestuar në 26 maj të vitit 2015 në qendër të qytetit të Elbasanit, për llogari të shtetit italian, pasi një ditë më parë ai ishte shpallur në kërkim ndërkombëtar nga Interpol Tirana. Policia njoftoi asokohe se, Ardian Subashi ishte dënuar nga Gjykata e Modenas, me 23 vjet e 3 muaj e 17 ditë burgim për veprat penale të “Shfrytëzimit të prostitucionit” dhe “Prodhimit dhe mbajtjes pa leje e armëve luftarake dhe e municionit” parashikuar nga nenet 110 dhe 600 të Kodit Penal Italian. Po ashtu, Subashi ka qenë edhe subjekt i OFL ku vitin e kaluar së bashku me 3 persona të tjerë u është kërkuar deklarimi i pasurisë.
Ajo që të bën habi është fakti se si ka mundësi që një person i dënuar për vepra të rënda nga një shtet tjetër dhe i arrestuar po për llogari të një shteti tjetër nuk është ekstraduar.
Për këtë çështje lindin menjëherë disa pyetje:
Përse nuk është ekstraduar drejt Italisë Ardian Subashi?
Çfarë vendimi ka marrë gjykata lidhur me këtë çështje?
Nga një kërkim në faqen zyrtare të Gjykatës së Elbasanit, nuk rezulton asnjë e dhënë mbi rastin në fjalë. Nuk ka asnjë informacion lidhur me ecurinë e çështjes së arrestimit të Ardian Subashit për llogari të autoriteteve italiane dhe mosekstradimin e tij drejt Italisë.
