Banorët e Laknasit janë përplasur sërish me punëtorët e firmës që kërkon të ndërtojë thertore në zonë këtë të Enjte. Raportohet se fadroma e firmës është futur në Laknas në orën 03:00 të mëngjesit të sotëm dhe ka shkatërruar e prerë dhjetëra pemë. Në mbështetje të banorëve ka qenë dhe ambientalisti Sazan Guri i cili pretendon se është kërcënuar me jetë.
Sipas Gurit kanë qenë nipat e administratorit të firmës ata që i kanë drejtuar armën duke lëvizur me makinë.
Ambientalisti u shpreh se nuk i trembet kërcënimeve, por është i shqetësuar vetëm për sigurinë e familjes së tij.
“Disa djem ishin duke udhëtuar me makinë dhe më drejtuan pistoletën. Jam kërcënuar 3 herë. Unë jam i prekur se mund të ketë pasiguri familja, por unë nuk kam frikë. Me mua nuk matet dot njeri, mua nuk më kërcënojnë dot. Nuk i kam frikë, pro ata duhet t’i vënë gishtin kokës që nuk kanë punë me mua. Le të fitojë me logjikë ai, jo me armë. Janë nipërit e Bledar Dacit, administratori i kësaj kompanie”, tha Guri për gazetarët.
Guri u drejtua drejt komisariatit të policisë në Kamëz për të bërë kallëzimin e tij në lidhje me ngjarjen.
