Në kulmin e debateve në Partinë Demokratike, pas vendimit të kreut demokrat Lulzim Basha për përjashtimin nga Grupi Parlamentar të ish-Kryeministrit Sali Berisha, ambasadorja amerikane Yuri Kim ka ftuar Kryetarin e PD në një pritje, me rastin e 30 vjetorit të rivendosjes së marrëdhënieve diplomatike mes Shqipërisë dhe SHBA.
Në pritjen e Kim nuk ka qenë i pranishëm Presidenti Ilir Meta, por edhe Kryeministri Edi Rama, i cili ndodhet në një vizitë zyrtare në Abu Dhabi.
Por në pritjen e organizuar ishte kreu demokrat Lulzim Basha, i cili shfaqet mes dy ambasadorëve, Yuri Kim dhe Luigi Soreca.
Vendimi i Bashës për përjashtimin e Berishës nga Grupi Parlamentar u përshëndet nga Ambasada e SHBA, e cila premtoi një bashkëpunim të ngushtë me partinë më të madhe të opozitës.
Në anën tjetër, ish-Kryeministri Sali Berisha ka nisur një seri takimesh të pagëzuara me emrin “Foltorja” me anëtarët e PD, që synojnë thirrjen e Kuvendit Kombëtar të PD-së. Kreu demokrat Basha ka deklaruar se nuk do të ketë asnjë mbledhje forumesh për të marrë në analizë apo vendime lidhur shpalljen non grata të Berishës nga DASH.
