Pasi bëri homazhet e tij në nderim të oficerit të rënë në krye të detyrës Saimir Hoxha, Presidenti Ilir Meta dha një prononcim për mediat.
Ai tha se ky është një moment reflektimi për një luftë frontale kundër krimit të organizuar.
“Është një moment i dhimbshëm që t’i japim sot lamtumirën e fundit një oficeri hero të Policisë së Shtetit, por edhe një prindi, një familjari të shkëlqyer si n/komisari Saimir Hoxha, që nuk e meritonte të ndahej nga jeta, komuniteti dhe nga familja. Është një moment reflektimi për një luftë frontale kundër krimit të organizuar, por edhe dekurajimin e krimit ordiner, ashtu sikurse është një prioritet lufta çdo sekond kundër trafikut të drogës, kundër atyre të cilët jo vetëm përfitojnë prej saj, por për të shpëtuar sa më shumë të rinj, sa më shumë fëmijë që bien për fat të keq në prehrin e këtij fenomeni shkatërrimtar dhe më pas janë përgjegjës për akte të tilla që trondisin një shoqëri të tërë. Është një luftë që duhet bërë çdo sekond”, u shpreh Meta.
