Ish-Kryeministri Sali Berisha ka ironizuar nga Foltorja e Durrësit nismat e prezantuara së fundmi nga kreu demokrat, Lulzim Basha, lidhur me atë që e konsideroi si beteja parlamentare.
Berisha, duke u ndalur në propozimin e Bashës për uljen e TVSH nga 20 në 6 % për produktet e shportës, tha se opozita nuk ka asnjë lidhje me paketën fiskale. Sipas ish-Kryeministrit, opozita mund të atakojë paketën fiskale, por s´mund të thotë ne do të propozojmë. Duke u ndalur te deklarimet për nisjen e reformave, Berisha tha se s´mund të bëhet asnjë reformë pa reformuar më parë Partinë Demokratike, e cila nëse do të mbetet kështu, do të jetë thjesht një shtojcë e Qeverisë.
Berisha komentoi skandalin e fshirjes nga listat e anëtarësisë të të moshuarve.
“Një pensionist më takoi në zyrë dhe më tha: hapni ca zyra që të regjistrohemi, se na kanë përjashtuar. Të vijmë të regjistrohemi, ta dinë që jemi edhe ne.
PD nuk mund të jetë parti e të ardhmes, nëse nuk shndërron në shtyllë kryesore të saj meritokracinë. Ekzistojnë potenciale të jashtëzakonshme për këtë gjë. Kjo nënkupton tërheqjen e një elite të mirë të shqiptarëve brenda dhe jashtë vendit.
Po ju jap një shembull këtu. Në vitin 1991, isha vëzhgues në zgjedhjet në Bullgari. Një parti mbretërore, fitoi 3 përqind të votave. Kjo parti, pas 5-6 vitesh u bë partia kryesore e Bullgarisë. Ajo arriti të integrojë vendin në NATO dhe BE. Një nga shkaqet kryesore ishte ekipi që zgjodhi. Një ekip ekspertësh me kualifikimet më të larta.
Ua dhashë këtë shembull, që hapja jonë ndaj vlerave të shqiptarëve, kudo që ndodhen, është jetike për të kapur kohën e humbur dhe përshpejtuar zhvillimin e vendit,” tha Berisha.
Sipas tij, pa u reformuar PD-ja, ajo do të vazhdojë të jetë shtojca e qeverisë.
