Aktivistja Evi Kokalari, e cila ishte në krah të ish-Kreministrit Sali Berisha në Foltoren e Durrësit, akuzoi kreun demokrat Lulzim Basha se përjashtoi nga Grupi Parlamentar liderin historik të PD, për të mbyllur dosjen e tij në SHBA.
Kokalari tha se për 2 apo 3 vite Basha nuk mund të hynte në SHBA pikërisht për shkak të kësaj dosjeje lobimi, për të cilën u paguan 750 mijë dollarë.
Por PD, përmes një deklarate e cilëson Kokalarin një spekulante politike, e cila guxoi sot të përsëriste përpara shqiptarëve shpifjet e Edi Ramës dhe Taulant Ballës ndaj Kryetarit të Partisë Demokratike Lulzim Basha.
“Autoritetet përgjegjëse me kërkesë të vetë Partisë Demokratike hetuan për 2 vite lidhur me shpifjen e Edi Ramës dhe Taulant Ballës, duke provuar në mënyrë ligjore dhe përfundimtare se ato ishin vetëm shpifje.
Ricikimi i të njëjtave shpifje, bëhet për të njëjtin qëllim, atë të mbajtjes në këmbë të regjimit kriminal të Edi Ramës. Për këtë arsye, Partia Demokratike do të padisë nesër penalisht për shpifje znj. Evi Kokalari, e cila mund të paraqitet në gjykatë për të provuar akuzat e rreme me dëshmitarët e saj të rremë Edi Ramën dhe Taulant Ballën”, thuhet në deklaratën e PD.
