Një person është shpallur në kërkim policor lidhur me vrasjen e efektivit të policisë Saimir Hoxha paraditen e kësaj të Marte.
Ai është Aldi Rama.
“Autori i dyshuar është shtetasi Aldi Rama, 21 vjeç, i dënuar më parë për prodhim dhe shitje të narkotikëve dhe mbajtje pa leje të armëve të ftohta, i cili është larguar me automjet nga vendngjarja”, njoftoi policia. Burime policore bënë me dije se foto e tij është shpërndarë në të gjitha stacionet e policisë dhe po punohet për arrestimin e autorit të dyshuar.
Ngjarja ndodhi rreth orës 10:30, në Ishull- Lezhë.
“Në rrethana ende të paqarta është qëlluar me armë zjarri në drejtim të grupit të kontrollit të territorit për parandalimin e kultivimit të bimëve narkotike. Si pasojë është plagosur me armë zjarri oficeri i Krimeve në Komisariatin e Policisë Lezhë shtetasi Saimir Hoxha, 44 vjeç, i cili për pasojë të plagëve të marra ka ndërruar jetë gjatë rrugës për në spitalin Rajonal Lezhë”, njoftoi policia.
Ende nuk ka asnjë të arrestuar lidhur me krimin. “Shërbimet e Policisë kanë rrethuar zonën me qëllim kapjen e autorit”, thanë burime zyrtare.
Pamje nga vendngjarja
“Në ndihmë të Policisë lokale janë nisur forcat speciale Renea, grupe të FNSH-së dhe një grup i posaçëm hetimor nga Drejtoria e Përgjithshme e Policisë së Shtetit për të bërë të mundur zbardhjen e plotë të rrethanave të ngjarjes, identifikimin dhe kapjen e autorëve”, shtuan të njëjtat burime.
Pamje nga vendngjarja
Lexo edhe:
FOTO/ Kush është efektivi i policisë që u qëllua për vdekje gjatë kontrolleve për drogë
