Presidentja e Komisionit Evropian, Ursula von der Leyen ka përcjellë një mesazh në Twitter para nisjes të turit treditor në Ballkanin Perëndimor, nga data 28-30 shtator.
“Sot filloj vizitën time në gjashtë partnerët tanë të Ballkanit Perëndimor përpara Samitit tonë javën e ardhshme. Mesazhi im është i qartë: ne ndajmë një të ardhme të përbashkët evropiane. Ne jemi duke e përgatitur atë tani, duke kapërcyer COVID së bashku, duke investuar në mënyrë strategjike, duke u dhënë mundësi të rinjve tanë”, shkruan ajo.
Ndalesa e parë e presidentes së KE-së do të jetë Tirana. Ceremonia e mirëseardhjes për Presidenten e Komisionit Europian, Ursula Von der Leyen do të mbahet në orën 08:50 në Pallatin e Brigadave.
Gjatë vizitës do takohet me kryeministrin Rama dhe presidentin Meta. Në Tiranë do të qëndrojë deri pasdite dhe pastaj do të udhëtojë drejt Maqedonisë së Veriut.
