Gjoba deri në 20 mijë lekë dhe pezullim patentash. Këto janë masat që aplikoi Policia Rrugore në rrugën interurbane Tiranë – Elbasan, gjatë mbrëmjes së djeshme.
Sipas policisë, janë evidentuar nga kontrolli me radar 10 drejtues mjetesh që qarkullonin me shpejtësi mbi normat e lejuara, shpejtësi që varionin nga 130 km/h deri 161 km/h, të cilëve iu pezullua leja e drejtimit nga 1 deri në 3 muaj dhe iu vendos gjobë nga 7.000 deri në 20.000 lekë të rinj.
Policia bëri të ditur se 14 gjoba nga 2.000 deri në 4.000 lekë të rinj u vendosën për shpejtësi mbi normat e lejuara, që varionte nga 116 km/h deri në 127 km/h .
Kontrollet kanë evidentuar gjithashtu 9 shoferë të cilët drejtonin mjetin nën efektin e alkoolit në masën që varionte nga 0.31 mg/l deri në 0.44 mg/l dhe që iu është pezulluar leja e drejtimit.
Si dhe janë vendosur 13 masa administrative me vlerë nga 5.000 deri në 15.000 lekë të rinj secila për drejtim mjeti nën efektin e alkoolit, por pa sanksionin plotësues të pezullimit të lejes së drejtimit.
