Ish-Kryeministri Sali Berisha, në “Foltoren” e organizuar në Vlorë, u shpreh se këto takime synojnë të bashkojnë demokratët dhe t´i kthejmë Partisë Demokratike zemrën, që janë vota e lirë dhe parimet.
Berisha tha se si asnjëherë tjetër në këto 30 vjet jemi defacto drejt asgjesimit të pluralizmit, pasi në krye të PD, është një njeri që nuk pyet askënd, as forumet dhe as statutin e partisë.
“Basha thotë se nuk do të ketë mbledhje të forumeve, pra ai po asgjeson pluralizmin. Ai thotë se nuk pyet për forumet, për statutin, për anëtarët e partisë. Kjo është fantazma më e shëmtuar e pluralizmit. Edi Rama e ka kapur për fyti Bashën, ndaj kushtrimi është: në këmbë të gjithë të mbrojmë demokracinë dhe pluralizmin”, tha Berisha.
Sipas tij, si mundet që një parti, e cila votohet nga 620 mijë shqiptarë, të ketë në krye dikë që nuk pyet as për forumet dhe as për statutin.
“Unë u largova dhe kam thënë gjithmonë se ishte një largim pa kthim. Kisha vendosur të mos kthehesha kurrë, mirëpo rrethana të tilla, të zgjojnë edhe nga varri po të jesh, për ti dalë zot”, tha Berisha.
Duke iu rikthyer çështjes së shpalljes “non grata” nga DASH, Berisha tha se pasi mësoi mbi vendimin, zgjodhi të ndiqte një rrugë ligjore.
“Jam politikani shqiptar që kam takuar çdo sekretar shteti, qofshin republikanë apo demokratë. Iu kundërvura projektit të Soros për kufirin mes Serbisë dhe Kosovës, iu kundërvura projektit të “Ballkanit të Hapur”, ndaj dhe u shpalla person “non grata”.
Nuk e kam hedhur në gjyq për vendimin, se ai është çështje e tyre, unë e hodha në gjyq për shpifje”, tha Berisha.
