Zgjatja e mandatit të KPK dhe KP, vjen reagimi i parë nga ONM

Operacioni Ndërkombëtar i Monitorimit ka reaguar ditën e sotme lidhur me propozimin e mazhorancës për zgjatjen e mandatit të Vettingut për KPK, mandati i të cilit përfundon në qershor 2022, dhe Komisionerëve Publikë.

“Në përputhje me mandatin e monitorimit që i është dhënë ONM-së nga Kushtetuta e Shqipërisë, ONM konsideron se është me rëndësi parësore që të përfundojnë të gjitha rastet e verifikimit në pritje në periudhën më të shkurtër të mundshme kohore, duke ruajtur konsistencën dhe integritetin e procesit.

Për të arritur këtë rezultat, është e nevojshme një zgjatje e kufizuar në kohë e mandatit kushtetues të anëtarëve të Komisionit të Pavarur të Kualifikimit dhe të Institucionit të Komisionerëve Publikë.

Kjo do t’i lejojë dy organet të përfundojnë të gjitha rastet në të cilat ka filluar hetimi. Është në kompetencën e autoriteteve shqiptare të përcaktojnë afatet e sakta të një shtrirjeje të tillë, në konsultim të ngushtë me aktorët përkatës, përfshirë Komisionin e Venecias”, thuhet në reagimin e Operacionit Ndërkombëtar të Monitorimit.

LEXO EDHE  Do udhëtonin drejt Zvicrës me pasaporta false, arrestohen turqit në Rinas

Kushtetuta parashikon që me përfundimin e mandatit të KPK, vettingu kryhet nga KLP dhe KLGJ, respektivisht për prokurorët dhe gjyqtarët, ndërsa seancat monitorohen nga përfaqësuesit e ONM. Për të shtyrë mandatin e KPK dhe KP duhet një konsensus në Kuvend mes pozitës dhe opozitës, pasi duhen realizuar ndryshime Kushtetuese. Zyrtarisht PD nuk është shprehur lidhur me qëndrimin e saj lidhur me kërkesën e PS, ndërsa LSI ka shprehur kontestime.