Një biznesmen shqiptar raportohet se është arrestuar pasi akuzohet se ndihmoi bosin turk të kriptovalutave Faruk Fatih Özer.
Gazeta turke “Sabah” shkruan se në pranga u vu Edevaldo Haxhiu rreth orës 00:30 të kësaj të Enjteje.
Ndërkohë, nga ana e policisë ende nuk ka një informacion zyrtar për ndalimin e 36-vjeçarit nga Shijaku.
Edevaldo Haxhiu, referuar të njëjtit burim mediatik, është nipi i Armand Dukës, Presidentit të Federatës Shqiptare të Futbollit. “Sabah” shkruan se ai, bashkë me persona të tjerë, ka ndihmuar Faruk Fatih Özer të fshihet në Shqipëri. Megjithatë, raporton e përditshmja turke, Edevaldo Haxhiu nuk i ka pranuar akuzat.
Nga një kërkim në Qendrën Kombëtare të Biznesit, rezulton se Edevaldo Haxhiu është pronar i disa bizneseve në vend, mes tyre një kompani ndërtimi, një gazetë sportive dhe një kompani sigurie.
Themeluesit i “Thodex”, Faruk Fatih Özer, është shpallur në kërkim ndërkombëtar nga Turqia. Ai akuzohet se mashtroi rreth 400 mijë njerëz dhe u zhduk me 108 milion dollarë.
Faruk Fatih Özer është ende në arrati, ndërsa media turke publikuan foto të tij, duke raportuar se pas arratisjes nga Turqia ai fshihej në Tiranë.
/BN/
Lexo edhe:
Policia konfirmon arrestimin e Edevaldo Haxhiut/ Akuzohet se fshehu bosin turk
