Të Enjten, në Kosovë, janë regjistruar 2 raste të vdekjes nga koronavirusi. Ministria e Shëndetësisë, në raportin ditor, ka njoftuar se janë regjistruar edhe 133 raste të reja të të infektuarve bazuar në 4.139 testime.
Autoritetet shëndetësore kanë konstatuar se nga COVID-19 janë shëruar edhe 805 pacientë, ndërsa raste aktive janë 6.077.
Prej shfaqjes të pandemisë në Mars të vitit 2020, autoritetet shëndetësore në Kosovë kanë regjistruar mbi 159.000 raste të infektimit.
Prej tyre, 2.919 persona kanë vdekur.
Më herët, Shërbimi Spitalor Klinik dhe Universitar i Kosovës ka njoftuar se në spitalet publike, trajtim mjekësor nga COVID-19 po marrin 455 pacientë. “Prej tyre 361 me oksigjeno-terapi dhe 42 në gjendje të rënduar shëndetësore në kujdes intensive”, thuhet në njoftim.
Prej nisjes së fushatës së vaksinimit, 474.783 persona janë vaksinuar me dy doza kundër këtij virusi.
