Ish-drejtuesi i Prokurorisë së Përgjithshme, Adriatik Llalla është dënuar me dy vite burgim nga Apeli i Gjykatës së Posaçme.
Këtë të Mërkurë, apeli la në fuqi vendimin e dhënë në shkallën e parë ndaj ish-kryeprokurorit Adriatik Llalla. Verdikti i gjykatës ishte në përputhje me kërkesën e prokurorisë, ndërsa mbrojtja kërkoi pafajësi. Avokati i tij, në një prononcim për mediat, tha se vendimi do apelohet.
Më 20 maj, gjykata e Posaçme e dënoi me 2 vite burg, si dhe 5 vjet heqje funksionesh publike, ish-Prokurorin e Përgjithshëm Adriatik Llalla, për “fshehje dhe mosdeklarim të pasurisë”. Po ashtu, Gjykata vendosi edhe konfiskim të disa pasurive, gati 22 mijë metra katrorë truall dhe një apartament në Durrës. Nga ana e avokatit të kryeprokurorit u ankimua vendimi, që u la në fuqi ditën e sotme nga gjykata e apelit.
Vetë ish-kryeprokurori nuk ishte i pranishëm në seancë. Raportohet se ai ndodhet në një spital jashtë vendit, ku po merr mjekim, për shkak të problemeve shëndetësore.
I pyetur nga gazetarët, avokati i Lallës konfirmoi se ish-kryeprokurori ndodhej në spital, por tha se nuk ka informacion nëse ndodhet brenda apo jashtë vendit.
Prej shkurtit 2018, Llalla është pjesë e listës së zezë të Departamentit Amerikan të Shtetit, që i ka ndaluar hyrjen në SHBA atij dhe familjarëve.
