Policia njofton se “i ka hequr përfundimisht patentën” një 25-vjeçari nga Durrësi pasi është konstatuar i dehur në timon. Fillimisht ai u ndalua për të verifikuar veshjen e xhamave të makinës, por gjatë kesaj procedure është konfliktuar me policët duke i kërcënuar ata me fjalë dhe veprime.
Ai i është drejtuar njërit prej efektivëve me fjalët: “O do të zhvesh unë ty sonte o s’ka. Unë të flas si burri-burrit, kurse ti më bën k**vën mua në telefon”.
Pas kësaj, atij i është bërë edhe testi i alkoolit ku ka rezultuar se ishte i dehur. Të riut i është konstatuar një masë prej 0.35 mg/l alkool në gjak.
Policia njoftoi se:
Nga kontrollet e kryera nga shërbimet e Policisë ka rezultuar se shtetasi A. K. drejtonte nën efektin e alkoolit, në masën 0.35 mg/l, mjetin tip “Audi”, me xhama të riveshur. Gjatë kontrollit dhe veprimeve policore, ky shtetas i ka kundërshtuar dhe kërcënuar punonjësit e Policisë. Në përfundim të veprimeve hetimore dhe procedurale, shtetasi A. K., 25 vjeç, banues në lagjen nr.14, Durrës, është proceduar penalisht për veprat penale “Mosbindja ndaj urdhrit të punonjësit të Policisë” dhe “Kanosja për shkak të detyrës”. Gjithashtu, këtij shtetasi i është pezulluar përfundimisht leja e drejtimit, pasi e ka në mënyrë të përsëritur këtë shkelje (drejtim mjeti nën efektin e alkoolit).
