Deputeti Agron Gjekmarkaj është emëruar nga kreu demokrat Lulzim Basha si drejtues politik i demokratëve në Lezhë. Vendimi ka ardhur pas dorëzimit të mandatit nga Mark Marku, i cili kryesonte listën e deputetëve demokratë në Qarkun e Lezhës.
Vendimi për emërimin e tij është njoftuar nga kryedemokrati Lulzim Basha në mbledhjen e sotme të Kryesisë së PD dhe Kryesisë së Grupit Parlamentar të kësaj partie.
Mark Marku nuk pranoi që të merrte mandatin që demokratët i dhanë në qarkun e Lezhës pas divergjencave të forta me lidershipin e PD-së.
Me largimin e Mark Markut, në Kuvend u rikthye Elda Hoti, e cila në mandatin e shkuar fitoi mandatin pasi ishte renditur në listat e LSI.
Gjekmarkaj është shfaqur pro kreut demokrat Lulzim Basha në debatet që kanë përfshirë këtë parti, pas vendimit për përjashtimin e ish-Kryeministrit Sali Berisha nga grupi parlamentar demokrat. Gjekmarkaj e ka justifikuar Bashën me faktin se kërkesa ka ardhur nga SHBA dhe nëse ky vendim do të kalonte për votim në Grupin Parlamentar nuk do të miratohej.
