Organizata Politike ka reaguar lidhur me ngjarjen e rëndë të ndodhur në një prej galerive të minierës së Bulqizës, ku i blllokuar ka mbetur minatori Muharrem Plaku, 61 vjeç.
Organizata Politike në deklaratën e tij shprehet se prej 56 orësh minatori Muharrem Plaku gjendet i bllokuar në një galeri të Zonës D në Bulqizë, në pronësi të ish-kryetarit të Bashkisë së Bulqizës Myfit Duriçi.
Sipas OP, kjo që po ndodh me Muharremin është fati potencial i përditshëm i të gjithë minatorëve, të cilët nevoja i shtyn të pranojnë kushte pune pa asnjë siguri përveç urimit “Të rujt’ Zoti!”.
“Institucionet shtetërore kanë kapitulluar përpara pronarëve e mafiozëve të kromit. Pas çdo aksidenti përgjegjësia u lihet ose viktimave, ose shokëve të punës.
Ndërkohë vëmendja publike rrëmbehet nga palaçot e cirkut partiak të Tiranës. Ky cirk përditë e më i gërditshëm ka vetëm një qëllim: të na ndajë nga njëri-tjetri dhe të na largojë vëmendjen nga problemet e vërteta që po varfërojnë dhe lënë pa shpresë shumicën dërrmuese të shoqërisë.
Ne, aktivistët e Organizatës Politike, urojmë që Muharrem Plaku të dalë shëndoshë e mirë nga ferri ku e ka shtënë grykësia e pronarit dhe pushtetarëve.
Kjo ngjarje e bën edhe më urgjent ndërtimin e një fronti të madh shoqëror për të drejtat në punë dhe dinjitetin në shoqëri”, thuhet në reagimin e Organizatës Politike.
