KPK shkarkon nga detyra gjyqtarin e Elbasanit

Gjyqtari i Elbasanit, Bujar Musta pas shkarkimit nga KPK. Foto: Edmond Hoxha

Komisioni i Pavarur i Kualifikimit shkarkon nga detyra Bujar Mustën, gjyqtar pranë Gjykatës së Rrethit Gjyqësor Elbasan.

Komisioni i Pavarur i Kualifikimit zhvilloi sot një seancë për shpallje vendimi për subjektin e rivlerësimit, Bujar Musta. Trupa Gjykuese e përbërë nga Olsi Komici, Suela Zhegu, Lulzim Hamita vendosi shkarkimin nga detyra e subjektit të rivlerësimit Bujar Musta, gjyqtar pranë Gjykatës së Rrethit Gjyqësor Elbasan.

Gjatë seancës dëgjimore të 15 shtatorit, Komisioni ngriti dyshime se gjyqtari i Elbasanit, Bujar Musta ka fshehur një apartament pas kontratave fiktive dhe se nuk ka pasur burime të ligjshme për krijimin e pasurive. Gjithashtu, u konstatuan dyshime për veprime të kundërligjshme në ushtrimin e detyrës dhe favorizim të të proceduarve. Gjithashtu, Drejtoria e Sigurimit të Informacionit të Klasifikuar, DSIK kishte paraqitur në KPK një raport ku paraqiteshin informacione që ngrinin dyshime për përfshirjen e subjektit në korrupsion pasiv, veprime të kundërligjshme dhe shpërdorim detyre.

LEXO EDHE  Parashikimi i motit për ditën e diel, 17 Tetor 2021

Bujar Musta e ka nisur karrierën në sistemin e drejtësisë në vitin 1993 dhe punon prej më shumë se dy dekadash si gjyqtar në Gjykatën e Rrethit Elbasan. Në vitin 2014, Musta i është nënshtruar një procedimi disiplinor dhe ka marrë “vërejtje me paralajmërim” nga Këshilli i Lartë i Drejtësisë.