Ish-ministri socialist i Ekonomisë e Financave, Arben Malaj ka shprehur pritshmëritë për qeverinë “Rama 3”, që pritet të votohet në parlament këtë të Enjte.
Malaj ndalet dhe te pesë pikat kryesore të programit të qeverisë së re dhe kredibilitetin e kabinetit.
Në një reagim në rrjetet sociale, Malaj shkruan:
Vetëm në vende ku demokracia është e dëmtuar rëndë dhe ku elitat parafabrikate qeverisin me arrogancë dhe të babëzitur mund të ndodhë që një kryeministër i cili për rreth 1.2 vite të mandatit të dytë nuk ka firmosur VKM, që nënkupton se Rama nuk ka marrë pjesë në mbledhje qeverie për 1.2 vite, pra që ka munguar në rreth 30% të mbledhjeve, të kërkojë një mandat të tretë për modelin e tij qeverisës me oligarkët dhe për oligarkët, me një qeveri ku shumicën e bëjnë shokët, gratë e shokëve që do të punojnë për oligarkët shokë apo bashkëpronarë pa letra.
Populli i mençur shqiptar thotë se: “Ky stan këtë bulmet ka”. Pra stani Rama3 i Fermës së Kafshëve të përshkruar aq mjeshtërisht nga George Orëell mund të prodhojë hirë.
Programi me 5 shtylla për qeverinë personale Rama3 i ka disa nga 5 shtyllat me dëmtime strukturore të renda nga goditjet e rënda të tërmeteve që i shkaktojnë korrupsioni epidemik, gjobat mbi 350 million euro nga vendimet e gjykatave ndërkombëtare që kërcënojnë nivelin e borxheve publike dhe stabilitetin e financave të shtetit dhe pro oligarkëve.
Shtylla e pestë duhet të ishte shtylla e parë – shtylla e shtetit ligjore që fillon me fundin e kulturës që hajdutët politikë dhe oligarkët si vëllezërit siamez të ndahen me bisturi shumë profesionale nga trupi i institucioneve kushtetuese.
Kredibiliteti i disa ministrave duke filluar me zv/kryeministrin “tigër” është një shtyllë e thyer që jo vonë do kërcënojë dhe shtyllat e tjera të programeve dhe të ndërtesës vet vezulluese të qeverisë Rama3.
Kredibiliteti i statistikave publike dhe veçanërisht në financat publike është dëmtuar rendë nga manipulimi i tyre duke fshehur borxhet e pa papaguara, etj.
