Një 23-vjeçare kosovare nga qyteti i Drenasit, e identifikuar si Zaife Imeri, ka ndërruar jetë ditën e sotme në rrethana të paqarta. Një prej familjarëve të saj, përmes një postimi në rrjetet sociale, ka ngritur akuza se e reja vdiq vetëm tri ditë pas marrjes së vaksinës, duke lënë të kuptohet se ka qenë injektimi i vaksinës shkaku i vdekjes.
Nga ana tjetër, Drejtori i Qendrës Kryesore të Mjekësisë Familjare në Drenas, Ismet Bogiqi, ka konfirmuar për Telegrafin lajmin se vajza është vaksinuar më datën 13 shtator, përmes një procedure të rregullt vaksinimi.
“Vajza është vaksinuar me procedurë të rregullt, më 13 shtator, ka marrë dozën e parë të vaksinës Pfizer. Nuk ka pasur ndonjë problem gjatë vaksinimit, Mjekësia ligjore tash do të merret me rastin”, deklaroi ai.
Nuk dihet ende gjendja shëndetësore e 23-vjeçares përpara marrjes së vaksinës, apo nëse ajo vuante nga ndonjë sëmundje specifike.
Lidhur me rastin, mediat në Kosovë kanë provuar të marrin edhe një përgjigje nga Ministria e Shëndetësisë dhe Instituti Kombëtar i Shëndetit Publik (IKSHPK), por që deri në këto momente institucionet nuk kanë dhënë ndonjë përgjigje.
Kujtojmë se në Kosovë qytetarët mund të marrin një nga dy vaksinat e certifikuara nga EMA, Pfizer dhe AstraZeneca, por që nga informacionet paraprake nuk bëhet me dije se cilën prejt tyre kishte injektuar e reja.
