Policia e Pogradecit, në kuadër të vijimit të operacionit “Hudënishti”, ka sekuestruar 38 kilogramë të tjera lëndë e dyshuar narkotike kanabis, e ndarë në pako, e destinuar për t’u trafikuar jashtë vendit.
Ka shkuar në 4 numri i personave të arrestuar, katër të tjerë janë shpallur në kërkim dhe një është proceduar penalisht si persona të përfshirë në një grup që merrej me trafik droge.
Policia bën me dije se ditën e sotme u arrestaun shtetasit Orestis Spirollari, 31 vjeç, banues në Pogradec dhe Kleanth Dokollari, 22 vjeç, banues në fshatin Hudënisht, Pogradec.
Në kuadër të këtij operacioni u shpall në kërkim shtetasi L. Sh., 20 vjeç banues në Hudënisht dhe u procedua penalisht për veprën penale “Moskallëzimi i krimit” shtetasja E. H., 31 vjeçe, banuese në Pogradec.
“Gjatë hetimit 4 mujor, si edhe gjatë kontrollit të ushtruar nga shërbimet e Stacionit të Policisë Kufitare Tushemisht dhe Komisariatit të Policisë Pogradec, në liqenin e Pogradecit, u konstatua një mjet lundrues tip skaf, me të cilin autorët e dyshuar, po trafikonin drejt Maqedonisë së Veriut, një sasi prej 38 kg lëndë të dyshuar narkotike kanabis, e cila u sekuestrua në cilësinë e provës materiale së bashku me skafin, një gomone, një automjet tip ‘Benz’, si edhe sende të tjera që kanë ndihmuar për kryerjen e kësaj veprimtarie kriminale”, informon policia.
