Një i ri në Fier është marrë peng për dy orë, njoftoi këtë të Mërkurë policia. Blutë bënë me dije se janë arrestuar dy autorët e dyshuar dhe është shpallur në kërkim i treti.
Ndaj tyre rëndon akuza për veprat penale “Heqja e paligjshme e lirisë”, e kryer në bashkëpunim.
“Specialistët për Hetimin e Krimeve në Komisariatin e Policisë Fier bënë ndalimin e shtetasve Erjon Agalliu, 42 vjeç dhe Arben Bleta, 54 vjeç dhe shpallën në kërkim shtetasin B.A., 40 vjeç, banues në Fier. Këta shtetas, në bashkëpunim me njëri tjetrin, për motive të dobëta, kanë dhunuar fizikisht dhe i kanë hequr lirinë në mënyrë të paligjshme për rreth dy orë shtetasit A. R., 25 vjeç, banues në Fier”, njoftoi policia.
Me marrjen e njoftimit, shërbimet e Komisariatit të Policisë Fier kanë bërë të mundur identifikimin, lokalizimin, kapjen dhe ndalimin e dy autorëve dhe po punojnë për kapjen e autorit të tretë, shtuan të njëjtat burime.
