Një tjetër sasi kokaine është sekuestruar në Portin e Durrësit. Droga, 7 kilogramë e 700 gramë, është gjetur në një kontejner me banane që ishte porositur nga firma “Alba Exotic Fruit”, konfirmoi policia.
Aksioni
“Nga Task Forca permanente që vepron në Portin e Durrësit, është ushtruar kontroll i imtësishëm në një nga kontejnerët i ngarkuar me banane i ardhur nga Ekuadori, për llogari të kësaj firme, ku si rezultat i kontrollit të imtësishëm në pjesën fundore te kapakët e motorrëve frigoriferike, u gjetën dhe u sekuestruan 8 pako me lëndë narkotike të dyshuar kokainë. Task Forca permanente që operon në Portin e Durrësit vijon veprimet hetimore, nën drejtimin e SPAK-ut”, njoftoi policia.
Kontejneri raportohet se kishte disa ditë që kishte mbërritur në port dhe mbahej nën vëzhgim.
Rast i përsëritur
Kjo është e disa here brenda viteve të fundit që sekuestrohet kokainë në ngarkesat me banane që importohen nga Amerika e Jugut.
Ndërkohë, më 13 Korrik, në një ngarkesë po me banane që vinte nga Amerika e Jugut me porosi të “Alba Exotic Fruit”, u sekuestrua një sasi prej rreth 12 kg kokainë. Menaxheri i firmës u arrestua, ndërsa administratori u shpall në kërkim. Të dy mohuan të kenë gisht në trafikimin e kokainës.
Edhe më herët, në ngarkesat me fruta të porositura nga kjo kompani, janë sekuestruar kokainë.
