Skandal mund të quhet promovimi i krimit, diktaturës dhe simboleve të komunizmit, duke përdorur fëmijë të mitur. Foto e mëposhtme është publikuar në rrjet nga historiani dhe gazetari, Kastriot Dervishi, ku duken qartazi fëmijë të mitur që i prijnë ithtarëve të diktatorit Enver Hoxha.
Në rastin më të mirë është një provokim që i bëhet atyre mijëra shqiptarëve, brezit të dytë të ish-të përndjekurve politikë, që vuajtën burgjet e diktaturës apo u internuan. Nuk është një rastësi, aq më shumë kur në qeverisje të vendit, ndodhen pasardhësit e ish-bllokmenëve, nipër e mbesa të atyre që drejtuan fushatën kriminale, ndaj çdo shqiptari që etiketohej si armik i partisë, kulak apo ballist.
“DEBATIK-u. Krimi promovohet me fëmijet. Magazina është e njëjta. Kurrë ndonjëherë në këto 30 vite, enverizmi nuk ka qenë kaq i ringjallur dhe sponsorizuar”, shkruan Dervishi, duke postuar foton e mëposhtme.
Dhe kjo do të ndodhë përsa kohë në 30 vjet pluralizëm nuk u dënuan krimet e komunizmit, kur gjithçka mbeti si një betejë verbale mes atyre që përfaqësonin Partinë e Punës së Shqipërisë, me emrin e ndryshuar Parti Socialiste, dhe krahut tjetër, të ashtëquajturve të djathtët apo të qendrës së djathtë.
Shqipëria ndoshta është i vetmi vend ish-komunist që kurrë nuk dënoi zyrtarisht krimet e diktaturës, kur edhe ata ish-bllokmenë pavarësisht se u akuzuan për gjenocid, u dënuan për konsumin e kafeve, apo kur rezolutat kundër komunizmit ose zverdheshin në sirtaret e Kuvendit, ose tundeshin sa për të krijuar debatin e rradhës.
Edhe pse ka 30 vite që sistemi diktatorial u shemb, duket se ithtarët e komunizmit, ata që shfaqen me portrete diktatorësh edhe në ceremonitë zyrtare të Kryeministrit në datën e çlirimit apo në ditën e dëshmorëve, po i injektojnë fëmijëve “dashurinë” për diktatorin, duke kryer një krim, që fare mirë mund të dënohej, ashtu sikundër Gjermania dënon ata që mund të mbajnë portretet e Hitlerit.
