Komisioni i Prokurimit Publik ka shpallur të pavlefshëm tenderin për mirëmbajtjen e makinës së blinduar në pronësi të shtetit ku fitues ishte shpallur oferta më e lartë.
Ky prokurim i hapur nga Drejtoria e Shërbimeve Qeveritare ka hasur në ankesat e 2 kompanive, të cilat kanë kërkuar rishikimin e vendimit për përjashtimin nga procesi.
Për kontratën shfaqën interes 4 subjekte dhe fitues është përzgjedhur “Power Industries” me ofertën 3 milionë e 490 mijë lekë, vetëm 9700 lekë më pak se fondi limit i vendosur në dispozicion, raporton Ora News.
Pretendimet e dy kompanive që kishin paraqitur ofertë më të ulët nuk u morën në konsideratë nga autoriteti kontraktor i cili vazhdoi me procedurat, duke e çuar rastin në KPP.
Në dokumente thuhet se shkak për skualifikimin është bërë mungesa e skemës së montimit për të gjitha pjesët e këmbimit si dhe skema e montimit të gomave, raporton Faxnews.
Po ashtu operatorët pretendojnë se subjekti fitues nuk plotëson kriteret e kualifikimit për të ofruar shërbimin e kërkuar.
Pas shqyrtimit të ankesave KPP u ka dhënë të drejtë 2 ankimuesve si dhe ka renditur një sërë vërejtjesh për Komisionin e Vlerësimit të Ofertave pasi ky i fundit nuk kishte përcaktuar qartë dhe saktë kriterin e veçantë të kualifikimit.
Në këto kushte i është kërkuar Drejtorisë së Shërbimeve Qeveritare që të anulojë këtë procedurë dhe në rishpalljen e saj të ketë parasysh konstatimet e bëra.
DENONCO