Një 45-vjeçar, banues në Fier, u arrestua nga policia në Pikën e Kalimit Kufitar të Kakavijës, pasi u kap me një pako me 278 gramë heroinë.
I arrestuari është shtetasi S.Q, i cili po udhëtonte me makinën e tij tip “Benz” në drejtim të Greqisë. Ai është kaluar në vijën e dytë për kontroll më të imtësishëm ku policia i ka gjetur të fshehur në makinë një pako me heroinë.
Njoftimi i policisë:
Policia Kufitare intensifikon kontrollet për parandalimin dhe goditjen e veprimtarisë kriminale në fushën e trafikimit të lëndëve narkotike. Goditet një rast i tentativës së trafikimit të lëndëve narkotike.
Arrestohet në flagrancë një 45-vjeçar. Sekuestrohet një pako e mbushur me lëndë narkotike e dyshuar heroinë, 1 automjet dhe 1 celular.
Shërbimet e Policisë Kufitare Kakavije, si rezultat i shtimit të kontrolleve me qëllim parandalimin dhe goditjen e paligjshmërisë, bazuar dhe në analizën e riskut, në dalje të RSH-së, pas verifikimit të të dhënave në sistemin TIMS, kanë kaluar për kontroll në vijën e dytë automjetin tip “benz” që drejtohej shtetasi S. Q., 45 vjeç, banues në Fier.
Gjatë kontrollit të ushtruar në automjet, nga shërbimet e përbashkëta të Policisë Kufitare, Fontex-it dhe të doganës, është bërë e mundur gjetja e një pakoje të mbështjell, brenda të cilës kishte lëndë të dyshuar narkotike heroinë, me peshë 278 gramë.
Në cilësinë e provës materiale u sekuestrua lënda narkotike, automjeti dhe 1 aparat celular.
Në përfundim të veprimeve të kryera nga specialistët për Hetimin e Narkotikëve në DVP Gjirokastër u bë arrestimi në flagrancë i shtetasit S. Q., 45 vjeç, banues në Fier.
Materialet i kaluan Prokurorisë Pranë Gjykatës së Shkallës së Parë Gjirokastër për veprën penale “Trafikim i lëndëve narkotike”.
