‘Je turpi i Kosovës!’/ Haradinaj kërkon dorëheqjen e Albin Kurtit

Ramush Haradinaj akuzon qeverinë e Albin Kurtit për korrupsion dhe i kërkon Kryeministrit të Kosovës të japë sa më parë dorëheqjen, edhe për keqmenaxhimin e pandemisë, situatën ekonomike të vendit dhe dështimin në politikën e jashtme.

“Albin, përderisa i ke angazhuar hajnat e vegjël të dalin nëpër televizione, unë ende nuk mora përgjigjie nga ju për shumë pyetje që i kam bërë vazhdimisht. Ministrat tu, ai i Brendshëm, e Drejtësisë, dhe i Infrastrukturës dikur e akuzonin qeverinë time për Nexhat Krasniqin, siç e quanin “kryekriminel” dhe “baba i tenderëve”. Tash Nexhati është i angazhuar edhe në qeverinë tënde, konkretisht në ministrinë e cila në dy muaj ka dhënë 29 tenderën njëburimore. A u bëre edhe ti si Nexhati, apo ai u bë i mirë tash? Po 38 kontrata sekrete, në dobi të kujt janë? Ku po shkojnë ato para?”, shkruan Haradinaj në Facebook.

Haradinaj akuzon Kurtin edhe për nepotizëm te emërimet në administratë, se nuk mbajti premtimin për reciprocitet me Serbinë, pas heqjes së taksës 100 për qind të vendosur nga Haradinaj dhe për dështim me pandeminë.

“Hoqe punëtorët shëndetësorë nga puna, profesionistë të trajnuar dhe me përvojë për trajtimin e të prekurve nga virusi. Tri javë pas mburrjeve tua, arritëm në rekordin e zi të vdekjeve. A po e marrin qytetarët tanë kujdesin e duhur shëndetësor? A i ke vizituar spitalet që të shohësh përpjekjet titanike te mjekëve e stafit teknik? Albin, e nise vaksinimin me vonesë, duke e rrezikuar vendin dhe ekonominë që të mbyllet. Asnjë vaksinë nuk u sigurua nga buxheti shtetëror, e edhe ato që erdhën si donacione, po skadojnë për shkak të paaftësisë tënde dhe tagrambledhësve tu që të organizojnë e të hapin më shumë pika vaksinimi për qytetarët”, thotë ai.

LEXO EDHE  Basha-Ramës: The që Bechetti nuk do marrë asnjë lek, sot po t’i merr në euro

Ish-kryeministri shkruan se me Albin Kurtin Kosova është shndërruar në kampione të keqmenaxhimit të pandemisë dhe për blere të gazit rus, në kundërshtim me interesat strategjike të Kosovës, që janë me SHBA.

“Albin, as unë e as Aleanca, kurrë nuk do të mbështesim shkelësit e ligjit. Ne i dojmë ata në burgje, por jo përmes gjykimit tënd publik, përmes hajnave të vegjël që shfaqen si fantazma të gjalla në ekrane. Por, përmes organeve të drejtësisë, të cilave ti e ushtria jote po iu bëni presionin më të madh të mundur. A jemi ne shtet totalitar? Jo, por me çasjen tënde për kapjen e institucioneve të pavarura, po rrezikohemi të arrijmë edhe në atë situatë. Kush je ti? Ku po na çon? Ti që po e përdhos edhe gjakun e Dëshmorëve, që lëkund edhe eshtrat e tyre në varre. Ti që u bëre turpi i Kosovës. Marrë!”, mbyll reagimin e tij, Ramush Haradinaj.