Kantautori i njohur, Riza Dolaku, ka ndërruar jetë në moshën 72-vjeçare në Prishtinë. Ai ka humbur betejën me një sëmundje të rëndë në mushkëri.
Lajmin e hidhur e ka konfirmuar për ‘RADIO 1’, miku dhe bashkëpunëtori i të ndjerit, kompozitori Afrim Macula.
“Na iku ky njeri i dashur, i veçant dhe i madh për nga natyra muzikore. Riza përcjellet sot në ora 13:00 në banesën e tij të fundit, në varrezat e kryeqytetit, në Prishtinë”, u shpreh Macula në ‘RADIO 1’.
Riza Dolaku është autor këngësh të njohura. Ai ishte kompozitor që studioi në Akademinë e Muzikës në Beograd. Filloi shkollën e mesme muzikore në Prizren dhe e përfundoi në Prishtinë. Riza Dolaku mori pjesë në festivale të ndryshme si: “Akordet e Kosoves”, “Zambaku i Prizrenit, Nota Fest etj.
Ai ishte gjithashtu një pianist dhe pjesë e trupit gjykues në festivalin “Shon Fest 2000”. Riza Dolaku u citua për aranzhimin e tij të këngës “E dehun jam” nga Nexhmije Pagarusha, e cila ishte realizuar nga Alma Bektashi në një ngjarje nderimi për Nexhmije Pagarushen, organizuar nga RTK.
