Zbulohet emri i bosit të “shtëpive të barit” në Spanjë, që u arrestua pak ditë më parë nga Europol.
Sipas hetimeve, Stefan Curri me origjinë nga Puka rezulton të jetë drejtuesi i grupit që merrej me trafik droge, të goditur në një operacion të policisë spanjolle në bashkëpunim me partnerët.
Prej vitesh, Curri jetonte jashtë vendit, kryesisht në Spanjë dhe Gjermani, ku dyshohet se kishte ngritur dhe rrjetin e të trafikut të lëndëve narkotike. I gjithë grupi funksionte në mënyrë hierarkike. Sipas hetimeve, në krye qëndronte vet Stefan Curri, e më pas anëtarë të familjes së tij, të cilët kishin për detyrë sigurimin e magazinave dhe shtëpive ku do kultivohej lënda narkotike e më pas trafikimin drejt vendeve të europës. Në përbërje të rrjetit kishte dhe shtetas spanjollë, sllovakë dhe grekë, të cilët zbatonin urdhrat e familjes Curri.
Trafikantët e kishin ngritur aktivitetin në qytetin e Tarragonas, Barcelonës, Gironës dhe Castellónit. Zona këto nga ku ky rrjet kriminal trafikonte më pas lëndën narkotike drejt destinacioneve të ndryshme. Referuar hetimeve, familja Curri paguante persona nga radhët e sektorit të pasurive të paluajtshme, por dhe të energjisë elektrike për sigurimin e ambienteve ku do të ngriheshin shtëpitë e barit me qëllim shmangien e policisë.
Ndërkohë, prej ditësh po kryhen verifikime nga policia në banka të nivelit të dytë sa i takon pasurisë që familja Curri ka të regjistruar në territorin shqiptar. Po ashtu, hetime pasurore po kryhen edhe ndaj shqiptareve të tjerë të arrestuar që ishin pjesë e këtij grupi të trafikut.
Gjatë operacionit të koduar “Dobra” u arrestuan 107 persona, mes të cilëve 60 shqiptarë. Grupi u zbërthye pas kapjes së një dërgese prej 140 kilogramë marijuane në Berlin në fund të vitit 2020.
Lexo edhe:
Detaje/ Grupi shqiptar i drogës, si nisën hetimet nga autoritetet spanjolle (VIDEO)
