Një person është vënë në pranga nga policia e Durrësit, që ka sekuestruar 4 mina me telekomandë.
Arben Elezi, 50 vjeç, banues në fshatin Larushk – Fushë Krujë, u arrestua.
Shërbimet e Policisë e kanë ndaluar Elezin në Shkafanë, aksin Ishëm-Durrës, dhe gjatë kontrollit fizik i gjetën dhe sekuestruan në cilësinë e provës materiale 4 mina me telekomandë të lidhura me aparat celular, të cilat ky shtetas do t’i shiste kundrejt shumës 10.000 euro, bënë me dije burime zyrtare nga policia.
Aksioni për ndalimin e tij i koduar “Furnitori” u krye nga shërbimet e Komisariatit të Policisë Durrës, në koordinim me strukturat hetimore të DVP Durrës, në bazë të informacioneve të siguruara në rrugë operative se një shtetas me tendencë kriminale në fushën e prodhimit dhe shitjes së minave me telekomandë po tentonte të shiste mina me telekomandë.
“Në bashkëpunim me Prokurorinë e Rrethit Gjyqësor Durrës, vijon puna për identifikimin dhe kapjen e personave të tjerë të përfshirë në këtë veprimtari kriminale, ndërsa materialet i kaluan Prokurorisë së Rrethit Gjyqësor Durrës, për veprime të mëtejshme”, njoftoi policia.
