Edhe Serie A i bashkohet kampionateve të futbollit që janë kundër lejimit të futbollistëve për t’u grumbulluar me përfaqësueset për kualifikueset e Katar 2022.
Me rritjen e infektimeve edhe në shtetit fqinj, liga e futbollit i druhet një shpërthimi të pandemisë në Serie A me rifutjen e futbollistëve në Itali ndërkohë që shqetësimi është më i madh për vetë klubet pasi lojtarët do të duhet t’i nënshtrohen një karatine 10 ditë duke humbur të paktën dy ndeshje të kampionatit.
FIFA ndërkohë ka reaguar nëpërmjet presidentit Infantino që i bën thirrje klubeve të mos pengojnë futbollistët për t’ju bashkuar kombëtareve.
“Kemi kaluar probleme globale në të kaluarën dhe duhet të vazhdojmë ta bëjmë. Lejimi i lojtarëve në përfaqësueset e tyre është çështje e një rëndësie shumë të madhe”, është apeli i presidentit Infantino.
Qëndrimi i numrit një të FIFA-s vjen pas komunikimit të Liverpool, për ndalimin e Mohamed Salah për t’ju bashkuar Egjiptit për ndeshjet kualifikuese kundër Angolas dhe Gabonit. Prej këtij episodi nisi edhe përplasja e radhës mes FIFA-s dhe Premier League, që tashmë ka në krah edhe La Ligan dhe Serinë A italiane.
