Një dramë ajo që po ndodh me qytetarët, të cilët edhe pse kanë paguar duke prerë biletat për udhëtim me traget drejt Italisë, po sorollaten nga kompania private dhe autoritetet.
Për të dytën ditë radhazi, qytetarë shqiptarë – kryesisht emigrantë që punojnë e jetojnë në Itali – pasi kanë kaluar pushimet në Atdhe, nuk kanë mundur të kryejnë udhëtimet e planifikuara drejt shtetit fqinj. Si të Enjten, ashtu edhe ditën e sotme, ka pasur anulim të udhëtimeve me tragete drejt Barit dhe Ankonës. Në këtë mënyrë, qytetarët që edhe pse kanë prerë biletat, janë sorollatur, duke mos marrë në kohë shërbimin për të cilin kanë paguar.
Situatë që krijon kosto për udhëtarët, të cilët detyrohen të qëndrojnë në pritje për orë të tëra për të mësuar fatin e udhëtimit – disa prej tyre më fëmijë të vegjël me vete – apo të humbasin ditët e punës.
Siç njoftoi Autoriteti Portual Durrës (APD), ditën e djeshme, pati vonesë në nisjen e tragetit “AF Francesca” drejt Barit, udhëtim i organizuar nga agjencia lundrimore “Adria Ferries”.
Edhe këtë të Enjte, autoriteti njoftoi se nuk do të ketë nisje nga Porti i Durrësit drejt Ankonës, deri në një njoftim të dytë. Kjo pasi trageti i linjave GNV dhe Adria Ferries kanë pësuar defekt në Itali, sqaroi APD.
Për situatën e krijuar, ministria e linjës ka shfaqur inferentizëm – duke mos denjuar të japë asnjë reagim. Deri më tani, Ministria e Transporteve e drejtuar nga Belinda Balluku e ka injoruar tërësisht dramën e emigrantëve.
Situata të tilla në fakt shfaqen herë pas here, duke nxjerrë në pah dështimin e Ministrisë së Transporteve për ti siguruar qytetarëve udhëtime normale me linjat e lundrimit detar të pasagjerëve.
Nga ana tjetër, një reagim nuk ka as nga kryeministri Edi Rama, i cili këto ditë është shfaqur në mediat e huaja duke folur me zell për pritjen që Shqipëria do ti bëjë afganëve që largohen nga talebanët. Por, kryeministri duket se i ka harruar emigrantët shqiptarë, që pasi i fton të kalojnë pushimet në Atdhe, nuk e ka problem ti lërë të vuajnë në port.
Qershinë mbi tortë sorollatjes së qytetarëve ja vë Policia, që pas një proteste nga udhëtarët të cilëve ju ishte shtyrë lundrimi ditën e djeshme – duke kërkuar të drejtat e tyre – nisi procedimet penale.
Zyrtarisht, policia njoftoi procedimin e tre personave lidhur me protestën e zhvilluar në Portin e Durrësit. Policia ngriti akuza për pengimin e qarkullimit të mjeteve të transportit dhe organizim e pjesëmarrje në manifestime të paligjshme edhe pse Gjykata Kushtetuese shfuqizoi disa muaj më parë parashikimin e Kodit Penal për leje nga autoritetet.
