Komiteti Teknik i Ekspertëve vendosi të mos ndryshojë masat për parandalimin e koronavirusit. Në një konferencë për mediat këtë të Mërkurë, theksi u vu te zbatimi i masave në fuqi dhe vaksinimi.
Kryetarja e komitetit, Mira Rakacolli pohoi se ka rritje të rasteve të reja me Covid dhe shtrimeve në spitale. Sipas saj, arsyeja kryesore prania e variantit delta.
Në konference, u fol për rritje të incidencës 2 javore me 5 herë dhe i të shtruarve në spitale.
“Mesatarja javore e rasteve të reja ka shkuar në 482 nga 291 krahasuar me një javë përpara. Numri i rasteve aktive në vend është rritur nga 5573 në 5792 që çon në rritje të incidencës dy javore me rreth 5 herë nga dy javë të shkuara. Incidenca 2-javore 202 raste për 100 mijë banorë. 35-64 vjeç është grupmosha më e prekur. Sa i përket pozitivitetit të mostrës, mbetet në shifrën 7.8%. Sa i përket bashkive të prekura, mesatarisht kemi çdo javë 42 bashki, me incidencën më të lartë janë Saranda, Himara, Malësia e Madhe, Shkodra, Tiranë dhe Vlora. Gjatë kësaj periudhe ka vazhduar me intensitet vaksinimi i popullatës”, tha ndër të tjera drejtoresha e ISHP, Albana Fico.
U kujtua se shatori është muaji i hapur i hapur i vaksinimit dhe qytetarëve iu bë apel për tu vaksinuar.
“Numri i të infektuarave të pavaksinuar është 3 herë më i lartë se atyre të vaksinuar dhe shumica e të shtruarve në spitale janë të pavaksinuar. Situata mund të kontrollohet me të njëjtin nivel masash duke i zbatuar me rigorozitet dhe intensifikim të vaksinimit”, tha Rakacolli e cila kujtoi dhe masat në fuqi:
- Detyrim i maskës në ambjente të mbyllura dhe ku s’mund të mbahet distancomi si qendrat tregtare, supermarketet e aeroportet.
- Grumbullimi në ambientet e jashtme lejohet deri në 50 persona duke respektuar distancimin social dhe protokollet e OBSH.
- Ora policore nga 24:00 deri 6:00, ndërsa muzika është e lejuar deri në 23:00.
- Kampionatet sportive deri në 30 përqind dhe në zbatim të protokolleve të ISHP, si dhe shfaqet teatrale, konferencat, etj, po me kapacitet deri në 30 përqind.
Shefja e departamentit të Sëmundjeve Infektive, Silva Bino tha se 27% e popullsisë është vaksinuar me të dy dozat. “37% me një dozë. Rastet e vaksinuara me një dozë janë 32 herë më pak sesa rastet e pavaksinuara. Pra kjo tregon efektin e rëndësishëm të programit të vaksinimit”, tha Bino.
Profesor Dhimitër Kraja tha se në spitalin infektiv numri i të shtruarve është rritur në 90, nga 1 ose 2 të shtruar që ishin një muaj më parë. Prej tyre, 40% janë femra, 60% meshkuj, tha Kraja. “Janë grupmosha të ndryshme, 15% mosha të reja. Rreth 40% janë me forma ta mesme, serioze ose me sëmundje të tjera. 30% janë në forma të rënda, dhe 30% me forma të rrezikshme për jetën”, tha Kraja.
