Ka ditë që i është bashkuar Tërbunit, por vetëm dje ka nënshkruar zyrtarisht. Vilfor Hysa është bërë përfundimisht lojtar i pukjanëve, duke shtuar cilësinë në ofensivë. Sulmuesi është i lumtur për zgjedhjen që ka bërë, gjë që e pohon edhe për “Panorama Sport”. Ai “driblon” arsyet që e detyruan të largohej nga Tomori (ku u stërvit për disa ditë). “Kjo është hera e parë për mua që do të mbroj ngjyrat e Tërbunit. Jam i kënaqur për këtë. Ekipi do të ndërtohet për synime të mëdha dhe nuk më mbetet tjetër veçse të jap maksimumin e mundshëm për këtë fanellë.
Konkurrenca pritet të jetë më e madhe në Kategorinë e Parë me ndryshimin e formulës, por ne do ia dalim. Kam pasur një ofertë edhe nga Tomori, por vendosa të kontribuoj për Tërbunin pasi projekti i pukjanëve më bindi. Shkaku i largimit? Nuk dua të flas më shumë, jam i përqendruar vetëm tek ekipi im i ri. Jemi duke u përgatitur nën urdhrat e trajnerit Beqiri, që është shumë i përkushtuar.
Të gjithë më kanë pritur mirë, nga shokët dhe stafi drejtues, duke filluar nga trajneri Beqiri, ai i portierëve Malaj, zv.trajneri Alcani, drejtori teknik Gjoni dhe presidenti Gjonaj, të cilët nuk do t’i zhgënjej. Këtu kam gjetur edhe shokë me të cilët kam luajtur edhe më parë. Do punojmë fort për ta nisur mbarë kampionatin. Takimin e parë zyrtar e kemi me Burrelin. Një përshëndetje dua të jap edhe për tifozërinë pukjane, që nuk na janë ndarë për asnjë moment në seancat stërvitore. Do të bëjmë të pamundurën për t’i kënaqur”, përfundoi Hysa.
