Nga BoldNews.al
Pak ditë më parë, Robert Aliaj, denoncoi me të drejtë situatën e plehrave në jug të vendit. “Plehrat janë fytyra jonë…”, ishte titulli i videos së tij. Por, kush duhet t’i pastrojë plehrat nga rrugët apo nga plazhet? Çdo bashki ka lidhur kontrata të majme për pastrimin dhe depozitimin e mbetjeve. Dhe, nuk mbetet pas as Himara, e cila ka pjesën më të madhe të plazheve në jug të vendit, duke filluar nga Palasa e deri në afërsi të Sarandës.
Situata e mbetjeve është alarmante në gjithë vendin dhe nuk mund të ndodhte ndryshe as në plazhe. Por, a ka zgjidhje? Nëse ata që do na drejtonin do të ishin pak të përgjegjshëm, natyrisht që po! Të gjithë shtetarët, qoftë ata qendrorët apo lokalët, e kanë mendjen te pasurimi i shpejtë. Ata bëjnë shkel e shko procedurat, ku në fund ata që e pësojnë janë turistët të huaj e vendas. Por, shikoni se çfarë ka bërë qirje Jorgo Goro, kryetari i Bashkisë së Himarës.
Sipas dokumenteve që disponon BoldNews.al, Bashkia e Himarës ka hapur një tender me procedurë të hapur e të thjeshtuar. Por, le të analizojmë datat. Tenderi është hapur në datën 13 gusht, në kulmin e sezonit turistik. Objekti është “shërbimi i pastrimit për zonat turistike” dhe fondi limit është 7.711.782 lekë pa TVSH, ose rreth 90 milionë lekë të vjetra me TVSH. “Kohëzgjatja e kontratës ose afati kohor për ekzekutimin është deri në 31.12.2021“, thuhet në dokumente.
Por, shikoni pak datën kur do të zhvillohet tenderi: 30 gusht 2021! Pra, në fund të sezonit turistik. Sipas këtyre datave lindin disa pyetje: Çfarë do të pastrojë Jorgo Goro në këto data? Ka më shumë nevojë pastrimi në shtator, tetor, nëntor apo dhjetor sesa në sezonin e verës? Çfarë analize kostoje ka bërë Goro për këtë tender? Apo, do t’ia japë këtë shumë ndonjë firme të preferuar që ndërkohë mund ta ketë ndihmuar me ndonjë kamion për të pastruar vendin e denoncuar nga Aliaj? Natyrisht, në këtë procedurë ka hije të mëdha dyshimi.
Dokumentet që ka siguruar BoldNews.al flasin se Bashkia e Himarës ka parashikuar të pastrojë plazhin në vjeshtë dhe dimër. Fillimisht thotë se kohëzgjatja është deri në 31 dhjetor 2021. Dhe, tenderi do të bëhet në fund të gushtit. Pra, vetëm për 4 muaj (shtator, tetor, nëntor, dhjetor). Por, në dokumentin vijues shkruan se “grumbullimi e transportimi mbeturinave urbane sezoni turistik, 5 muaj ose 153 ditë kalendarike“. Ku e gjeti muajin e pestë qirje Jorgo Goro?!
