Shtatëmbëdhjetë viktima nga koronavirusi u konfirmuan të hënën në Kosovë, bëri të ditur Ministria e Shëndetësisë.
Kjo është shifra më e lartë e të vdekurve e raportuar gjatë valës së fundit të koronavirusit.
Ministria e Shëndetësisë tha se në 24 orët e fundit u konfirmuan edhe 1,067 raste të reja pozitive, të cilat rezultuan pas 7,946 testimeve.
Raste aktive me koronavirus në Kosovë aktualisht janë 20,467.
Gjatë ditës, Shërbimi Spitalor Klinik Universitar i Kosovës njoftoi se në klinikat dhe spitalet në Kosovë janë të shtruar 929 pacientë – prej tyre 723 të konfirmuar me koronavirus. Sipas SHSKUK-së, 35 pacientë janë në gjendje të rëndë shëndetësore, ndërsa 688 janë duke u trajtuar me oksigjeno-terapi.
