Kadastra Shqiptare përfundoi një nga proceset më të gjata dhe me plot problematika, regjistrimin e atij që njihet si “Kompleksi Malajzian në Tiranë”.
Kompleksi ka një sipërfaqe prej 56.000 m2, me rreth 100.000 m2 ndërtim dhe në të përfitojnë 780 njësi banimi dhe shërbimi, apartamente, dyqane, zyra, etj.
Kreu i Kadastrës, Artan Lame tha se ky kompleks “mund të konsiderohet si dinosauri i ndërtimeve të palegalizuara, për arsye të moshës që zvarritet plot 25 vjet, për arsye të madhësisë 780 apartamente, dhe qoftë për arsye të problematikave që mbartte, mbivendosje pronash, vendime gjykatash, AMTP, të lëshuara në kohë të ndryshme, vendime të kthimit të pronave, probleme hartografike, etj”.
Inaugurimi i punimeve të tij është bërë në vitin 1995.
“Nga koha e fillimit të tij, në Shqipëri janë ndërruar 6 presidentë dhe 7 kryeministra, por problematika vazhdimisht është zvarritur dhe përcjellë nga njëra administratë tek tjetra, pa u zgjidhur dot asnjëherë. Është i jashtëzakonshëm volumi i punës dhe problematikave që ju desh të përballojë Drejtoria Vendore Tirane rurale 2 (drejtori Artur Çobani), por ishte edhe bashkëpunimi i vetë shoqërisë ndërtuese, e cila bashkëpunoi me drejtorinë tonë duke patur shpresën që kalvari i tyre çerekshekullor do të përfundonte”, tha Lame.
“Përfundimi i procedurave u mundësua tani falë eksperiencës së fituar vitet e fundit me legalizimin e pallateve të braktisura nga pronarët si edhe procedurat e formatuara me Ligjin 20/20 “Për përfundimin e proceseve kalimtare të pronësisë në RSH” dhe VKM 1040, date 25.11.2020, ‘Për përcaktimin e rregullave të zbatimit të kritereve të legalizimit dhe miratimin e modelit të Aktit të Legalizmit për ndërtimet pa leje’. Tashmë banorët do të kenë një afat 30 ditor për të verifikuar emrat dhe pasuritë e tyre në listat që po afishon Drejtoria Vendore e Kadastrës Tiranë Rural 2.Këto lista do të afishohen në Njësinë Administrative Kashar, në Zyrat e Shoqërisë ‘Kamza Development’ si edhe në faqen e FB të Kadastrës Shqiptare. Pas këtij afati Shoqëria do të fillojë shpërndarjen e dokumentit përfundimtar të pronësisë për secilin banor”, shtoi ai.
“Përfitoj nga rasti për të dhënë një përmbledhje të pallateve të legalizuara deri më sot: Në rang Republike, janë 902 pallate të legalizuara, me rreth 20.000 familje përfituese dhe mbi 2,4 milion m2 ndërtim”, përfundoi ai.
